Jerin Mutanen Da Baza Su Biya Sabon Kudin Harajin Bankuna Da Gwabanati Ba

A cewar bankin, matakin zai fara aiki ne nan da makonni biyu masu zuwa kuma ya ɓullo da tsarin domin magance barazanar laifukan intanet a tsarin hada-hadar kuɗi.

Sai dai tuni matakin ya tayar da ƙura a shafukan sada zumunta musamman a shafin X inda wasu ke nuna fushinsu kan yadda hukumomi ke ƙaƙaba jerin haraje-haraje a kansu.

CBN dai ya ce kuɗaɗen da aka cira daga asusun masu hulɗa da bankunan za a zuba su a asusun tsaron intanet na ƙasa wanda zai kasance a ƙarƙashin ofishin mai bai wa shugaban ƙasa shawara kan tsaro.

Duk da cewa CBN ya bijiro da harajin da ya janyo cece-ku-ce, bankin ya yi bayani cewa akwai waɗanda tsarin bai shafe su ba.

Jerin waɗanda harajin bai shafa ba

Kuɗin bashi: Bayarwa da kuma biyan bashi

Kuɗin albashi

Tura kuɗi tsakanin asusu da asusu a banki guda ko tsakanin banki da banki ga abokin hulɗa ɗaya.

Tura kuɗi daga wani asusu zuwa wani tsakanin abokan hulɗar banki ɗaya

Umarnin cibiyoyin hada-hadar kuɗi ga wasu bankunan

Kuɗin da bankuna ke tura wa CBN da kuma wanda babban bankin ke tura wa bankuna

Tura kuɗi tsakanin ressan bankuna a cikin banki ɗaya

Hada-hadar kuɗi tsakanin bankuna da aika kuɗi tsakanin bankin mai karɓa da kuma tura kuɗi da kuma ajiyar bankunansu.

Takardar tabbatar da tura kuɗi

Ajiya da tura kuɗi har da hada-hadar da ta shafi hannun jari na dogon zango kamar treasury bills da takardun lamuni da takardun alƙawarin biyan ƙayyadadden kuɗin ruwa

Shirye-shiryen gwamnati na inganta walwalar jama’a kamar biyan kuɗin fansho

Hada-hadar kuɗi don taimako har da tallafi ga cibiyoyin da ba na neman riba ba masu rajista

Hada-hadar kuɗi na cibiyoyin ilimi har da biyan kuɗin makaranta da sauran hada-hadar da ta shafi makarantu da jami’oi da sauran cibiyoyin ilimi.

Hada-hadar kuɗi a asusun banki na cikin gida kamar asusun wucen gadi na suspense account da clearing account da asusun kamfani na tattara riba da asara da hada-hada a reshen banki da ka iya haɗawa da asusun da ake kula da su a wani reshen bankin da asusun ajiya domin yin tattali da asusun ajiya da bankuna ke buɗewa a wasu bankunan da asusun da ɓangarori ke ajiye kuɗi domin yin cinikayya.

SERAP ta buƙaci a soke harajin

Ƙungiyar ƙoƙarin tabbatar da adalci ta SERAP ta nuna adawarta da sabon harajin na tsaron intanet.

Ƙungiyar ta buƙaci shugaban Najeriya Bola Tinubu da ya bai wa Babban Bankin Najeriya umarnin soke harajin kasancewar ya saɓa wa kundin tsarin mulkin Najeriya da kuma walwalar al’umma.

Wannan haraji zai zamo ɗoriya ne a kan jerin haraje-haraje da al’ummar Najeriya ke biya waɗanda Babban bankin ƙasar ya ƙaƙaba.

Cikin su akwai harajin kula da katin ATM, da kula da asusun ajiya, harajin gwamnati, cajin tura kuɗi daga wani banki zuwa wani da kuma harajin tura kuɗi ta laturoni.